Thursday, May 26, 2022

 


 

 

 

பால்: பொருட்பால்

அதிகாரம்/Chapter: செங்கோன்மை / The Right Sceptre

 

541

ஓர்ந்துகண் ணோடாது இறைபுரிந்து யார்மாட்டும்
தேர்ந்துசெய் வஃதே முறை.

 

542

வானோக்கி வாழும் உலகெல்லாம் மன்னவன்
கோல்நோக்கி வாழுங் குடி.

 

543

அந்தணர் நூற்கும் அறத்திற்கும் ஆதியாய்
நின்றது மன்னவன் கோல்.

 

544

குடிதழீஇக் கோலோச்சும் மாநில மன்னன்
அடிதழீஇ நிற்கும் உலகு.

 

545

இயல்புளிக் கோலோச்சும் மன்னவன் நாட்ட
பெயலும் விளையுளும் தொக்கு.

 

546

வேலன்று வென்றி தருவது மன்னவன்
கோலதூஉங் கோடா தெனின்.

 

547

இறைகாக்கும் வையகம் எல்லாம் அவனை
முறைகாக்கும் முட்டாச் செயின்.

 

548

எண்பதத்தான் ஓரா முறைசெய்யா மன்னவன்
தண்பதத்தான் தானே கெடும்.

 

549

குடிபுறங் காத்தோம்பிக் குற்றம் கடிதல்
வடுவன்று வேந்தன் தொழில்.

 

550

கொலையிற் கொடியாரை வேந்தொறுத்தல் பைங்கூழ்
களைகட் டதனொடு நேர்.

 இன்பம் - நெஞ்சோடு புலத்தல்

1291

அவர்நெஞ்சு அவர்க்காதல் கண்டும் எவன்நெஞ்சே
நீஎமக்கு ஆகா தது.

 

1292

உறாஅ தவர்க்கண்ட கண்ணும் அவரைச்
செறாஅரெனச் சேறியென் நெஞ்சு.

 

1293

கெட்டார்க்கு நட்டார்இல் என்பதோ நெஞ்சேநீ
பெட்டாங்கு அவர்பின் செலல்.

 

1294

இனிஅன்ன நின்னொடு சூழ்வார்யார் நெஞ்சே
துனிசெய்து துவ்வாய்காண் மற்று.

 

1295

பெறாஅமை அஞ்சும் பெறின்பிரிவு அஞ்சும்
அறாஅ இடும்பைத்தென் நெஞ்சு.

 

1296

தனியே இருந்து நினைத்தக்கால் என்னைத்
தினிய இருந்ததென் நெஞ்சு.

 

1297

நாணும் மறந்தேன் அவர்மறக் கல்லாஎன்
மாணா மடநெஞ்சிற் பட்டு.

 

1298

எள்ளின் இளிவாம்என்று எண்ணி அவர்திறம்
உள்ளும் உயிர்க்காதல் நெஞ்சு.

 

1299

துன்பத்திற்கு யாரே துணையாவார் தாமுடைய
நெஞ்சந் துணையல் வழி.

 

1300

தஞ்சம் தமரல்லர் ஏதிலார் தாமுடைய
நெஞ்சம் தமரல் வழி.

 

 

 

பால்: பொருட்பால்

அதிகாரம்/Chapter: செங்கோன்மை / The Right Sceptre

 

 திருக்குறள் வாசிப்பு

இன்பம் - உரை ஆசிரியருக்கும் வெளியீட்டாளருக்கும் நன்றி உரித்தாகுக. 

 

1291

அவர்நெஞ்சு அவர்க்காதல் கண்டும் எவன்நெஞ்சே
நீஎமக்கு ஆகா தது.

 

நெஞ்சே! நம்மை நினைக்காமல் இருப்பதற்கு அவருடைய நெஞ்சு அவருக்குத் துணையாக இருக்கும்போது நீ எமக்குத் துணையாக இல்லாமல் அவரை நினைத்து உருகுவது ஏன்?.

 

1292

உறாஅ தவர்க்கண்ட கண்ணும் அவரைச்
செறாஅரெனச் சேறியென் நெஞ்சு.

 

நெஞ்சே! நம்மிடம் அன்பு காட்டாதவர் அவர் எனக் கண்ட பிறகும், நம்மை வெறுக்க மாட்டார் என நம்பி அவரிடம் செல்கின்றாயே

1293

கெட்டார்க்கு நட்டார்இல் என்பதோ நெஞ்சேநீ
பெட்டாங்கு அவர்பின் செலல்.

 

நெஞ்சே! நீ எனை விடுத்து அவரை விரும்பிப் பின் தொடர்ந்து செல்வது, துன்பத்தால் அழிந்தோர்க்கு நண்பர்கள் துணையிருக்க மாட்டார்கள் என்று சொல்வது போலவோ?.

 

1294

இனிஅன்ன நின்னொடு சூழ்வார்யார் நெஞ்சே
துனிசெய்து துவ்வாய்காண் மற்று.

 

நெஞ்சே! முதலில் ஊடல் செய்து பிறகு அதன் பயனைக் கூடலில் நுகர்வோம் என நினைக்க மாட்டாய்; எனவே அதைப்பற்றி உன்னிடம் யார் பேசப் போகிறார்கள்? நான் பேசுவதாக இல்லை.


1295

பெறாஅமை அஞ்சும் பெறின்பிரிவு அஞ்சும்
அறாஅ இடும்பைத்தென் நெஞ்சு.

 

 

என் நெஞ்சத்துக்குத் துன்பம் தொடர் கதையாகவே இருக்கிறது காதலரைக் காணவில்லையே என்று அஞ்சும்; அவர் வந்து விட்டாலோ பிரிந்து செல்வாரே என நினைத்து அஞ்சும்.

 

1296

தனியே இருந்து நினைத்தக்கால் என்னைத்
தினிய இருந்ததென் நெஞ்சு.

 

காதலர் பிரிவைத் தனியே இருந்து நினைத்தபோது என் நெஞ்சம் என்னைத் தின்பது போலக் கொடுமையாக இருந்தது.


1297

நாணும் மறந்தேன் அவர்மறக் கல்லாஎன்
மாணா மடநெஞ்சிற் பட்டு.

 

அவரை மறக்க முடியாமல் வாடும் என்னுடைய சிறப்பில்லாத மட நெஞ்சத்துடன் சேர்ந்து மறக்கக் கூடாது நாணத்தையும் மறந்து விட்டேன்.


1298

எள்ளின் இளிவாம்என்று எண்ணி அவர்திறம்
உள்ளும் உயிர்க்காதல் நெஞ்சு.

 

பிரிந்து சென்ற காதலரை இகழ்வது தனக்கே இழிவாகும் என்பதால், அவருடைய பெருமையைப் பற்றியே என்னுயிர்க் காதல் நெஞ்சம் எண்ணிக் கொண்டிருக்கும்.


1299

துன்பத்திற்கு யாரே துணையாவார் தாமுடைய
நெஞ்சந் துணையல் வழி.

 

துன்பம் வரும்போது அதனைத் தாங்குவதற்கு நெஞ்சமே துணையாக இல்லாவிட்டால் பிறகு யார் துணையாக இருப்பார்?.


1300

தஞ்சம் தமரல்லர் ஏதிலார் தாமுடைய
நெஞ்சம் தமரல் வழி.

 

நமக்குரிய நெஞ்சமே நம்முடன் உறவாக இல்லாத போது, மற்றவர் உறவில்லாதவராக இருத்தல் என்பது எளிதேயாகும்.

Wednesday, May 25, 2022

 


மனநிலை

பச்சையூரில் மூன்று ஆண்டுகளாக மழை பெய்யவில்லை. மக்கள் குடிப்பதற்குக்கூடப் போதிய தண்ணீர் இல்லாமல் கஷ்டப்பட்டு வந்தனர். அதனால் ஊர்ப் பெரியவர்கள் ஒன்று கூடினார். அவர்கள் ஊரில் சில ஆண்டுகளாகக் கொண்டாடாமல் இருந்த ஊர்த்திருவிழாவை நடத்துவதற்கு முடிவு செய்தனர். ஊர்த்திருவிழாவும் சிறப்பாக நடை பெற்றது. ஆனால், மழை மட்டும் பெய்யவில்லை. அதனால் ஊர்மக்கள் மற்றோர் ஊருக்குச் சென்று வாழ்க்கையைத் தொடங்குவதற்கு முடிவு செய்தனர். அவர்கள் அனைவரும் ஐம்பது கிலோ மீட்டர் தூரம் நடந்து சென்றனர். செல்லும் வழியில் பெரிய கிராமம் ஒன்று இருந்தது. அதன் பெயர் வெற்றியூர். அது செல்வச் செழிப்புடன் இருந்தது. அதனைக் கண்டவுடன் அந்த ஊரில் தங்கி வேலை செய்து பிழைத்துக்கொள்ள முடிவு செய்தனர்.

வெற்றியூரில் உள்ள பெரியவர்களைப் பார்த்து வேலை கேட்டனர். அவர்களும் பச்சையூர் மக்களுக்கு வேலையும் தங்கிக்கொள்வதற்கு வீடும் கொடுத்தனர். அவர்களின் வேலை ஊருக்கு வெளியில் உள்ள காலி இடங்களில் மரக்கன்றுகளை நடுவது ஆகும். வெற்றியூரில் உள்ள மக்கள் மரங்களை வளர்ப்பதற்கு அதிகப் பணம் செலவழித்து வருவதைப் பார்த்து ஆச்சரியப்பட்டனர். அதனால், பணத்தைச் செலவு செய்துவரும் ஊர்மக்களைப் பார்த்து விவரத்தைக் கேட்டார்கள். அப்போதுதான் கடந்த இருபது வருடங்களாகத் தங்கள் கிராமத்தில் உள்ள மரங்களை எல்லாம் கொஞ்சம் கொஞ்சமாக வெட்டிக் காலிசெய்தது அவர்களின்  நினைவுக்கு வந்தது.

பச்சையூர் மக்கள் நீண்ட காலமாகத் தாங்கள் செய்துவந்த தவற்றை வெற்றியூர் முதலாளிகளிடம் கூறினார்கள். அவர்கள் பச்சையூரில் மரக்கன்றுகளை நடுவதற்கு வேண்டிய உதவிகளைச் செய்தார்கள். ஐந்தாண்டுகளுக்குப் பின்னர் பச்சையூரில் மழை பெய்யத்தொடங்கியது. ஊரில் உள்ள கிணறுகளில் தண்ணீர் பெருகத் தொடங்கியது. அதனால், வெற்றியூர் முதலாளிகளுக்கு நன்றி கூறிவிட்டுத் தங்கள் ஊருக்கு மகிழ்ச்சியுடன் திரும்பிச் சென்றார்கள்.  


 எழுதியவர் சி. கு ஆசிரியர்

நீதிக்கருத்து

பசுமையே வாழ்க்கையின் உயிர்நாடி

Monday, May 23, 2022

 


நம்ம விளையாட்டு


சின்ன சின்ன விளையாட்டு

சிங்காரக் குறுகுறு விளையாட்டு 

வண்ண வண்ண விளையாட்டு

வசந்த மளிக்கும் விளையாட்டு


திண்ணமான பெரு விளையாட்டு

தெவிட்டாத நல் விளையாட்டு

பட்டுப்போகும் உடம்பையும்

பவளமாக்கி நிற்கும் விளையாட்டு 


குழந்தைப் பருவம் மகிழ்வூட்டும்

கூடிக்கற்கும் நற்பெரும் விளையாட்டு

காளைப் போன்ற வீரத்தை

 கைகொடுத்துக் காத்து நிற்குமே!


Monday, May 16, 2022

 

                    நலமுடன் வாழ்ந்திடுவோம்


வெற்றுரை பேசிடும்  உலகினில்

வெல்லுரை பேசிடும் மனிதா!

வெல்லுரை பகரும்  கருவோ

விவேகத்தை வளர்த்திடும் என்றும்!!


நல்லுரை பேசிடுவோம் நாளும் 

நலம்பல விளைந்திடும் என்றும்

சொல்லுரை சுருக்கென்று  இருந்தால்

சுற்றம்கூடப் பகையாக மாறிடும்


நலம்பல விளைந்திடவே என்றும் 

நலமுடன் வாழ்ந்திடுவோம் உளத்திலே!


                                                                 -  சிகு


Saturday, May 14, 2022

 சொல்ல மறந்த கதை


சொல்ல மறந்தகதை ஆயிரமாயிரம்

சொல்லி முடித்தகதை ஆயிரமாயிரம்

அத்தனையும் நெஞ்சின் குமுறல்

நெஞ்சு சொல்லி முடித்த கதை


மனைவியிடம் சொல்லும்  கதை ஆயிரம்

மக்களிடம் சொல்லும் கதை பலவாயிரம்

பார்ப்பவரிடம் பகிரும்  கதை சிற்சில

பதுங்கிப் பதுங்கிச் சொல்லும் கதைபல


எத்தனை கதைகள் சொன்னாலும்  என்கதைக்கு

என்றும்  விடிவில்லை என்னிடம் மனத்தில் பொய்யில்லை  

புகழ்பாட மனமும் இல்லை பொறுப்பில் உயரவழியுமில்லை  

சொல்லமறந்த கதையா  மறைந்து நிற்கட்டுமே!!